* ... إيجيبشناوي ... *

* ... EGYPTIONAWY ... *

* ... انا من ايجيبت بلد الحضارة ... *

* ... و جدودى خوفو و سقارة ... *

* ... مش جاى اطالب و لا اناشد ... *

* ... و لا جاى عشان اعمل غارة ... *

* ... مش جاى اعيب على بلدى ... *

* ... و لا قلت نفسى ابقى هولندى ... *

* ... مكتوب عليا اعيش فيها ... *

* ... ايجيبشناوى و انا مرضى ... *

* ... ايجيبت بلدى و انا منها ... *

* ... غرقت كذا مرة فى نيلها ... *

* ... و لحست من طين حواريها ... *

* ... و شربت من نارها و ويلها ... *

* ... سيبونى دا انا نفسى اغنى ... *

* ... و ياريت ما حدش يقاطعنى ... *

* ... طول عمرى كافى شيرى خرى ... *

* ... و لا اى مخلوق يقلقنى ... *

* ... احنا شباب المحروسه ... *

* ... فطمونا يا اسطا على الكوسه ... *

* ... و علمونا صحيح ببلاش ... *

* ... و ابو بلاش مالهوش عوزه ... *

* ... سمونا جيل المستقبل ... *

* ... مستقبل ايه يابو مستقبل ... *

* ... تمللى مدينى الطرشه ... *

* ... و عايشلى دور عبده الاهبل ... *

* ... بسلامته عمره ما كان فشتك ... *

* ... و لا قال كلام بره المنطق ... *

* ... و كفايه قعدنا على النت ... *

* ... وفـ عهده اخترع التوكتوك ... *

* ... آى دونت هاف انى ثينج يا خال ... *

* ... و ما معييش تمن الخلخال ... *

* ... لا حيلتى شقه و لا وظيفه ... *

* ... فكرة جوازى ما هش ع البال ... *

* ... الهم راكب و مدلدل ... *

* ... و الكل راضى و متقبل ... *

* ... فراخنا جالها انفلونزا ... *

* ... حتى السمك بقى بيهرتل ... *

* ... متقدمين احنا تمللى ... *

* ... و الانجازات فى الترالالى ... *

* ... فى المونديال خدنا الزيرو ... *

* ... كان زيرو كام و النبى قوللى ... *

* ... شبابنا غرقان فى الطفره ... *

* ... و حالته تصعب ع الكفره ... *

* ... مؤهلات عليا و سفلى ... *

* ... متخصصه فى لف البفره ... *

* ... و بناتنا 100 فل و عشره ... *

* ... محتارة بين وزن و بشره ... *

* ... ضاعت فلوسك يابو سوسو ... *

* ... على شامبوهات ضد القشره ... *

* ... قالولنا نحلم ما عرفناش ... *

* ... بطلنا نحلم و ما ممتناش ... *

* ... ابو صلعه كان اصل الاصلى ... *

* ... قالهالنا و احنا ما صدقناش ... *

* ... لا قريبى باشا و لا عمى بيه ... *

* ... و لا احتكم على نص جنيه ... *

* ... لكنى عايش متكيف ... *

* ... عبدك ياربى و عالم بيه ... *

ههههههههههههه
واضح اني الي كتبها معباي
معلش ظروف بلدنا كدنا
ولازم تتقدم بينا عشان مفيش حل تاني غير كده

ههههههههههه قصيدة جامدة اوى بس دى متطلعش برا المنتدى الا نتمسك ههههههههههههه

هههه عندك حق يا ميدو بس ماتخافش لو اي حد شافها خقول انت اللي كاتبها و انا حطلع منها زي القرعة من الضفيرة هههههههههه

ثانكس يا فرح